Home » Limba Sarda » Brozzu Renzo » Renzo Brozzu: Animas in pena

Immagini del paese

Immagine 001.jpg

Statistiche

Tot. visite contenuti : 11322280

Notizie del giorno

 
Renzo Brozzu: Animas in pena PDF Stampa E-mail
Valutazione attuale: / 10
ScarsoOttimo 
Giovedì 03 Dicembre 2009 10:05

Est s'ijerru e-i s'abba a cadinos

fora tintinnat; urulat su 'entu;

paret piantu, paret su lamentu

de animas in pena in sos caminos.

 

Sas nues passan garrigas de abba

e miran dae s'altu dogni situ:

sos ch'han su cor'ammaliad'e frittu,

cun sas carenas a s'agabba agabba.


Sun sos bezzos, chi sunu tott'in luttu;

a boghe manna giamana sa morte,

bidende sa campagna in mala sorte,

tota pien'e frasca e chena fruttu.


E invocan sas nues e sos bentos

chi los aggiuen in custu disizu,

ca sun istraccos de dare fastizu

in custa terra piena 'e ammentos.


E sun ammentos chi sonan in coro

una musica dulche de chiterra,

de cando carignaian sa terra,

una tiaza fît de ispigas d'oro.


Ite fin sos ijerros de traschìa?

Fadigas e suore, vida 'e cane?

Cand'intendian profumu 'e pane,

s'anima morta torraiat bìa.


Fît disaogh'in tempus de messera,

cando s'abbrazzaian su mannuju

e isparghian peri su restuju

duos ojos pienos de ispera.


Isperaian chi su 'entu amigu

s'esserat fattu 'ider in s'arzola,

pro che giugher sa pula 'ola 'ola,

lassende nettos sos ranos de trigu.


Oe la miran nuda 'e laore

cudda chi ch'hana ancor'intro s'intragna;

e pianghen pro s'insoro cumpagna,

ca est che issos morzend'e dolore.


E si sun consumende che candela;

ma sa fiama ch'haian pro ghia

tenet intr'ogni coro ancora 'ia

s'ispera de salvare sa bandela.


E pregan e invocan a sas manos

chi han sa forz'e chi han vint'annos:

"Sanadeli sas penas, sos affannos,

dendeli meighina fatta 'e ranos".


Tando sos ojos hamus a tancare,

cuntentos de haer lassadu istigas

in duna terra pien'e ispigas

chi su mundu s'hat a indeorare.

 

Ultimo aggiornamento Sabato 29 Maggio 2010 16:28
 

Aggiungi un commento

Il tuo nome:
Indirizzo email:
Titolo:
Commento (è consentito l'uso di codice HTML):