E' possibile esprimere un voto sul gradimento degli articoli da noi proposti. Ti invitiamo ad esprimere un tuo giudizio e vedere i giudizi degli altri lettori.

Questa poesia è tratta dal volume “Rosas e ispinas de Baldedu”, Edizioni Ivo Melis, pubblicato dallo stesso Truddaju a Cagliari nel 1992. (v. pagg. 34-35)

A mizas sas istellas in paschera,

in sas tancas de chelu isconfinadas,

s’iden a largu ‘e pare e aggruppadas

istanotte chi limpia est s’aèra.

S’iden che ranos d’oro in sas tulittas

de su messaju: candidas e bellas,

rien imprateadas sas istellas

in cussas tancas mannas biaittas.

In mesu de s’immensa prateria[1]

passat unu caminu inghiajadu

a totu cantu impignu, attraessadu

da-e fadas ballende in mesania.

Ite notte de ninfas e de fadas

ch’est istanotte! Totu cussas tancas

asserragliadas de ‘amas biancas

sun che perlas in tela ricramadas.

E deo istanotte, in sa foresta

de custas baddes mias tentadoras,

so’ reu abbaidende oras e oras

su luminosu chelu ‘estidu a festa.

Su grigliu, in su silenziu de sa notte,

cantat subra s’orizu ‘e sa chijura,

e paren in s’altare ‘e sa natura

innos de unu dignu sazerdote.

Sos catteddos ligados a cadena

a su truncu ‘e s’alvure fozida

appeddan a su chelu e dan vida

a sa notte de lagrimas piena.

Sun lagrimas e perlas de lentore

chi in sa terra si falan e in naes,

pro abba santa de feras e aes,

pro gemmas ch’inghirlandan su fiore.

Sas feras dormin in su nidu insoro,

o intuppidas in naes e mattas

osservan de su chelu sas piattas

ricramadas a platinu e a oro.

Notte meravigliosa, caldu o frittu

non si nde serat in custa incontrada;

notte bella, serena: est ammajada

s’adde, su campu, sa foresta e litu!