E' possibile esprimere un voto sul gradimento degli articoli da noi proposti. Ti invitiamo ad esprimere un tuo giudizio e vedere i giudizi degli altri lettori.

"Del chirurgo Gavino Cossiga", annotava Giorgio Falchi, che ne ha curato la trascrizione, tratta da un manoscritto inedito dedicato alle "poesie sacre e profane di autori Chiaramontesi". (n.d.c.)

De su mundu s'allegria

Celestiale decoro,

Dormi, dormi, vida et coro

Et riposa, anima mia!

Et ite t'hada affannare,

Già ti canto, fizu meu,

Dormi Signore et Deu

Non mi fetas contristare,

Sa vida cheria dare

Pro ti dormire anninnia!

Dormi, dormi, vida et coro

Et riposa, anima mia!

Custa fit s'allegra 'ennìda

Ch'isettaia naschende,

Contristasa pianghende

A mama tua affliggida,

Ninna, ninna coro et vida

Proite mi das angustia.

Dormi, dormi, vida et coro

Et riposa, anima mia!

Cale in istremu dolore

M'angustiesit coro,

Cagliadi, bellu tesoro,

Fizu meu Creadore,

De su mundu Redentore,

De totu consolu e ghia.

Dormi, dormi, vida et coro

Et riposa, anima mia!

Si su meu est su destinu

Pianga sol'eo in cue,

Gaglia non pianghes tue

Fizu, Signore Divinu;

De ti portare in su sinu

Isco non meritaia.

Dormi, dormi, vida et coro

Et riposa, anima mia!

Tempus de festa et de risu

Cessada est como sa gherra,

Pro cussu esultat sa terra,

Giubilat su Paradisu,

Et unu amabile visu

T'adorant veru Messia.

Dormi, dormi, vida et coro

Et riposa, anima mia!

Ite cuntentu est su meu

Como chi t'ido et ti tratte,

Beneittu cuddu latte

Chi ti do, fizu de Deu;

De su mundu su recreu

Riposare ti cheria.

Dormi, dormi, vida et coro

Et riposa, anima mia!

Cantu devo vigilare

Chi ti siat beneittu,

Cudd'istentu, caldu et frittu

Ch'apo devidu passare;

Pro ti poder guvernare

In cuddu nie et biddia.

Dormi, dormi, vida et coro

Et riposa, anima mia!

Como mi toccat passare

In Gerusalemme ingrata,

Sa fuga in Egitto fatta

Laude ti potat dare,

Cantu devo lagrimare

Pro sa tua tirannia.

Dormi, dormi, vida et coro

Et riposa, anima mia!

De su mundu s'aurora

S'ornamentu de su Chelu,

Dormidi senza rezelu,

Ma non pianghes ancora,

Ca' già det benner cudd'ora

Suspirare in agonia.

Dormi, dormi, vida et coro

Et riposa, anima mia!

Ite cuntentu est su meu

Como chi t'hapo pasadu,

Dormi et istadi gagliadu

Riposa fizu de Deu;

De su mundu altu recreu

D'anghelos solu ghia.

Dormi, dormi, vida et coro

Et riposa, anima mia!