Desideriamo formulare ai nostri lettori tanti auguri di buona Pasqua.

Aisettare cale siat cosa

est’unu tremulare fitianu

in allegria o pena dolorosa.

Cand’aberis sos ojios su manzanu

ti zoccheddat in conca sa ‘idea

che ch’appas su chelveddu pagu sanu.

A puntu de nò rezer a sa rea

est tot’un’iscasciadu movimentu

ne sezid’istat frimma sa cadrea.

Cun su cor’a brinchitu in aumentu,

ch’intro sa cascia no cheret istare

massim’a totu cando ses cuntentu.

Ammajiad’a su puntu ‘e sonniare,

totu sos astros chi sun’in s’aera

chi cun sa manu si potan toccare.

Finas sa cosa finta paret bera,

sa fantasia intrat in possessu

a t’istrinare de ‘ogni manera.

Tot’est deretu, nudda est revessu,

sa gioia in su coro si ch’annidat

bolende chen’alas, sende arressu.

Totu sas cosas reales olvidat

s’imbaru dulche, chi s’astru lughente

falet a terra, cuntantu t’ischidat.

A iscuttas lu ses’indiferente

in apparenzia, ca ses’ammeladu

de nanner poi accollu finalmente.

Chi s’astru bellu in terr’est faladu

in sa dom’iscurosa fin’a ‘oe,

cudda lughe chi hamus disizadu.

Aisettende meses, su ‘e noe

a intonare cuddas cantilenas,

ch’auguran salud’e bonu proe.

Sas dies solianas e serenas,

chena umbra chi iscurighet sa die

e-i sas annadas sas pius pienas.

S’anima santa candida che nie,

sa chi su Deus bonu nos regalat,

mi sento preziadu rie rie...

...chi s’astru luminos’in terra falat!

Tzaramonte, su vinti de Abrile de su 2010