A fine Febbraio chiuderemo definitivamente il sondaggio sul nuovo anno. Ma chiameremo i nostri lettori a esprimersi su un altro quesito, che proporremo a decorrere dal 1. Marzo prossimo.

Millos sos mannos mios campagnolos
attraessende pasturas e tancas,
in berritta, in fusile e-i sas ancas
imperriadas in puddedros bajos,
tra cantigos de pastores e messajos
e murmuttos de abes e rizolos.

Su monte de ricramos est bestidu,
sas fadas giogan in s’unda ‘e su riu,
tra s’allegru e suave murmuriu
de sas abbas currende a su pendente:
su manzanu est dulche e risplendente
simmai in vida tua nd’hepas bidu!

Sos traos sun a borridas ruspende
e ponzende in dellirios su logu,
sos puddedros a brincu e a giogu
faghene festa in s’incantadu saltu;
sas chilandras (1) in chelu in altu in altu
dogni iscera ‘e cantu sun fattende.

Millos sos mannos mios coloridos
e in palas lis pendet sa berritta:
balla balla si godin s’aeritta
chi falat gioghittende da-e montagna.
Ite bella ch’est oe sa campagna,
tota piena ‘e cìulos e nidos!

Ite bellos chi sun son mannos mios
subra ‘e caddos fortes e lezeros!
De tipu paren chi sian severos,
però han coro ‘onu: a riguardu
han su tipu ‘e s’antigu omine sardu,
de paga ciarra e movimentos bios.

Faeddana de cando han postu paghes
duos chi fin trint’annos inimigos,
de usos e de odios antigos,
de festas campagnolas, de tusorzos,
de incunzas pienas, de laorzos
e de domos de fadas e nuraghes.

Faeddan puru de cando ingropperados
passaian in baddes solianas
cun sabias piseddas risulanas
bestidas a s’antiga e in su tuju
una bella collana ‘e oro ruju
e in pettus fremmaglios delicados.

Ite bellos chi sun a caddu in sedda
sos mannos mios! Totu su manzanu
trottende sun a redinas in manu
in campos de fiores profumados:
sos caddos cun sos zocculos ferrados
cazzana fogu in sa pedra niedda.

Cfr. BAINZU TRUDDAIU, Rosas e Ispinas de Baldedu, ed. Ivo Melis, Cagliari 1992, pagg. 53-54

Nota: (1) le allodole