Benvenuto nel nostro sito, che si propone di fornire una finestra sul presente ed il passato del nostro paese. Ci auguriamo che le informazioni da noi fornite possano essere di tuo interesse.

Mama si ch’est andada e-i sos adios

hat dadu, ma mi restat in su coro;

ca fit dignu e mannu su tesoro

cant’est istada in su regnu ‘e sos bios.

Como chi ch’est inie, so’ siguru

sa paghe santa no li dȇt mancare

in s’eternu riposu e b’hat a dare

pagh’e sinzeridade inie puru.

Comente in terra, cando in sa pinnetta

faghiat pane, incannonende sola;

o in sos rodos, fattende s’arzola

cun forza e brios, sabia e netta.

Pius no torras, Mama, che a tando,

cando m’has fattu piena ‘e saludu

e mi daias a dogn’ora aggiudu,

meravigliadu ancora mi dimando

it’agguantu tenet su mortale

cand’este obbligadu a fagher tantu.

Ignorat su dolore, su piantu,

fastidiu, pelea e dogni male.

Sos fizos pro sa Mama sun brillantes

de sa sudafricana miniera.

Sempre los bidet, da-e manzanu a sera,

brilladores che raros diamantes.

Però su coro zedit a sa morte,

finas si est bonu e de bonu sentidu;

pro chi appat gosadu o patidu,

pro totugantos misera est sa sorte.

Una Mama chi campat deghe fizos!

Deghe fizos no campan’una Mama.

Ca in sa vida mantenet sa trama

de sabiesa e bonos cussizos.

Poi s’avviat cun pagas peraulas.

Su silenziu in sa domo, in sa carrela.

Birgonzosa est azzesa una candela,

fattende lughe a sas battor taulas.

Cfr.: Poesias de Istevene Demelas, 2012, pagg. 7-8