Desideriamo formulare ai nostri lettori tanti auguri di buona Pasqua.

Ses fissa sentinella in cuss'altura

pro chi t'hapan fundadu da-e ora,

ses fattu de carcarea istrutura,

de sos Dorias fisti sa dimora.

Como distruttu e de mala figura

sos restos tuos sun bios ancora

e nisciunu ti faghet cumpagnia,

bestidu a pannos de malinconia.

Nott'e die su forte Maestrale

ti faghet insistente una carezza,

ti torrene a s'istadu originale

comente fit s'istrutura 'ezza:

supervu, maesrosu e uguale

coment'e cando fisti una fortezza.

Restet in Zaramonte sa memòria

pro cussa domo de Matteu Doria.

In cussa rocca has postu raighina,

a t'ider pares collocadu in aria:

has bidu pestes che-i sa malaria

e de seculos penso una deghina.

Como est un'istoria millenaria

e-i su tempus t'hat mandadu in ruina.

Como non ses fìorende che una rosa,

ca su tempus distruet dogni cosa.

Si ses ficchìdu già est una proa,

pruite ses suffrende frittu e caldu;

prezzisos che a tie a riguardu

nd'han fattu prima e a tie a coa:

prim'in Alghero e Casteddusardu,

poi nd'han fattu unu in Biddanoa.

Una ricca familia genovesa

est sa ch'hat fattu cust'abile impresa.

Poi 'e tottu su malu passare

espostu a bentu, a sol'e a nie:

Zaramonte est naschidu unu die

sutta pès a su tou casolare

e s'est fundadu adorende a tie

comente adoran su santu in s'altare

e t'ammirar ancora che una dea,

chi ses su simbulu de sa 'idda intrea.

Cfr. “Sas poesias de Istevene Demelas", Chiaramonti 2012, pagg. 35-36.