Benvenuto nel nostro sito, che si propone di fornire una finestra sul presente ed il passato del nostro paese. Ci auguriamo che le informazioni da noi fornite possano essere di tuo interesse.

O 'ezzona Musa mia,

bantu de tempos lontanos,

che in sos birdes beranos

dami torra poesia.

Dami chi canto a comare

chi est sezzida in carrela

ricramendesi sa tela

ca si devet cojuare:

dami filu a l'aggiuare

e fozas de fantasia,

chi a sa sua simpatia

aggiungo a dare bellesa.

Ajò, canta, ischida, pesa,

o 'ezzona Musa mia!

Cantamus de sas campagnas

piseddas ch'in su trainu

han in conca su cadinu

e in pettorras muntagnas...

Beni chi, si m'accumpagnas,

pro chi tenza pilos canos

lis ponimus in sas manos

unu quadru de pintore

ricramadu de amore,

bantu de tempos lontanos.

Dami tinta e pingo puru

su caminu inghiajadu

de unu chelu isteddadu

in nottes de pagu iscuru;

cumponzo su duru duru

pro sos pizzinnos mezzanos,

chi cun cavanos ispanos

no han reposu in sa ninna.

Ajò, dami carta e pinna

che in sos birdes beranos!

Pro s'istajone amorosa,

si mi daeras cantones

fatto 'ider sos puzones

in d'una mendula umbrosa.

Beni, Musa: non ch'hat cosa

chi non bramet cumpagnia!

Cantare totu cheria

cun murmutteddos de fadas:

che in epocas passadas,

Musa, dami poesia!

Cfr. BAINZU TRUDDAJU, Rosas e ispinas de Baldedu, Ivo Melis Editore, Cagliari 1992, pagg. 157-158