A fine Febbraio chiuderemo definitivamente il sondaggio sul nuovo anno. Ma chiameremo i nostri lettori a esprimersi su un altro quesito, che proporremo a decorrere dal 1. Marzo prossimo.

Sa manu santa, chi siat sigura

in sas oras de dolu e de annèu

e premurosa sa manu 'e Deu

a mantenner lontana s'isventura.

Sa criadura chi babbu no hada,

e l'est mancadu ca fattu l'hat fora,

sa manu mala, vile e impostora

de custa terra, in dolos serrada.

Sa vida 'enit segada in su naschere,

a palas de unu muru o de sa jaga.

In cussos males chilcamus sa paga,

chi nisciunu 'e nois podet paschere.

Sas carrelas s'ammudan e-i sas jannas

no s'abberin, ca tremen a su luttu.

De criaduras solas su mulmuttu

s'intendet, isparghende penas mannas.

Ca sun privos de sas pessones caras,

'ogni die s'intenden in su coro

su mancamentu de unu tesoro

cun tristura e mai risu in laras.

Su tempus passat, s'umore no mudat

de sas mamas bestidas de nieddu.

A boltas chi sinzeru unu faeddu,

s'omin'a coro abertu a fora iscudat!

S'haimus cun sa limba faeddadu,

cun sas armas lassadas in costòu,

connot'haimus unu mundu nòu,

de mortes e vendittas liberadu.

E paghe sant'in biddas e zittades

o in su campu sende in solitudine,

sa paghe diat passare un'abitudine,

su mundu pienu de sorres e frades.

Religiones e razzas tutt'unidas

sian, chena mirare su colore.

Cust'universu siat tottu amore,

prosperu che ispigas ingranìdas,

o che abba pulida in sa funtana,

sinzeridade pro sa nostra terra.

Agabbada che siat d'ogni gherra

sa paghe regnet bia e soberana.

Cfr. Poesias de Istevene Demelas, Essegi, Perfugas 2012, pagg. 63-64