Natale 2018 e Anno nuovo 2019

"Curridelos sos carasos,

punghidelis sos isprones,

chi sun tottu campiones

in custos birdes benales!"

Naraian frades Sales

a chie caddos romasos

gighiat, andend'a festas,

feos e mortos de fàmine.

Fin riccos de bestiàmine,

de tancas propietarios

puru fini, ma contrarios

a sas bideas onestas!

Fin sicarios e ladros,

sos pèssimos de sa zona;

ma lis faghian corona

tottu su chi bramaiana,

ca bastante furaiana

in cunzados e in padros!

Ma in festas campagnolas

fin sempre sos pius mannos...

Si creian, in cussos annos,

res de sas baddes terranas:

sempre a bèrtulas pienas

de arrustos e frisciolas!

Però tottu, sutta-sutta,

già ischian chie fini.

Tiu Bustianu Sini

los fatteit arrestare

e a los iscarcerare

s'ideini mal'allutta...!

Issos si faghian bidere

chi tenian fama netta:

sempr'attattuzos de petta

e de saboridos ticcos,

si parian d'essere riccos

in dogni issoro detzidere.

Però sas famas issoro

fin cunsideradas feas:

fin de pèssimas bideas

che Luzziferu in s'inferru,

duros pius de su ferru

in dogn'istrambu decoro...!

Bastat, non sigo piusu

a lis dare una piae:

daghi den esser cuddae,

in sos eternos cunfrontos,

già lis domandana contos

Deus, santos e Gesusu!

Menzione d’onore al Premio di poesia sarda CREI-ACLI sezione A, Sassari 1995

Cfr. Vintichimb’annos de poesia sarda CREI-ACLI de Sardigna, ed Gallizzi, Sassari 2014, pag.165