Cun sa berritta a pompa, s'arva cana,

dogni manzanu a caddu tuccaiat

pro 'ider sas cussorzas chi teniat

e bamas chi rendian casu e lana.

Bessiat chito chito in sos beranos,

attraessende tanca, padru e saltu;

sas chilandras cantende in altu in altu

parian dende festa a sos manzanos.

Mancu cando faghiat dies malas

si firmaiat de 'ider sas tancas,

cun su caddu nieddu in mesu 'e ancas

e su fusile luzzigu in sas palas.

Su fusile e rosariu in sas manos,

pro omines distintos e amabiles

fin duas cosas tantu indispensabiles

e los rendiat bonos cristianos.

E giaju meu, omine de tinu[1],

fieru e sacrusantu in sa peraula,

diflizile a ti narrer una faula,

ambos si los poniat in caminu.

Tando fin tempos de pena e jastizos:

in sas miradas de sa zente antiga

tribulfa leggias e fadiga,

famine e suore fin'a chizos.

Giaju riccu non fit, però fit unu

sempre padronu de su nezessariu:

mai mancu in su tempus pius contrariu

viviat a istogomo dijunu.

Giaju passende in sas tancas ervosas

latte sonniaiat a labias,

mattulos de ispiga in sas rodias[2]

terras, de aradura bisonzosas.

Fit un'omine antigu, unu pastore

chi s'arveghe a su 'elu connoschiat;[3]

in furesi e berritta si 'estiat

chi pariat un'omine de pore.[4]

Ma non fit malu, fit de coro 'onu,

ne mai cun nisciunu fattu hat briga;

fit legu, non leggiat una riga,

però de bonos sensos fit padronu.

Como hat finidu s'andera 'e sos campos,

cun su caddu nieddu non piusu

de andare a sas tancas faghet usu

ca in s'eternu regnu isterret giampos.

Cfr. BAINZU TRUDDAJU, Rosas e ispinas de Baldedu, Ivo Melis Editore, Cagliari 1992, pagine 49-50