Benvenuto nel nostro sito, che si propone di fornire una finestra sul presente ed il passato del nostro paese. Ci auguriamo che le informazioni da noi fornite possano essere di tuo interesse.

di Bainzu Truddaju

Sas tancas de su chelu isconfinadas

ite mannas chi sunu! Mì sa luna:

in paragone insoro paret una

sindria furriada in mesu chelu.

Est frìzida sa notte e-i su gelu

attrighinzit sas bramas fadigadas.

Est una notte fritta de frearzu,

simmai si nd’hat bidu ateras frittas:

sas tancas de su chelu biaittas

sun bombitende astrau da-e sas benas,

ca sas abbas arressas e serenas

sun beladas e duras che-i s’attarzu.

Non si pesat ne frina ne sisia.

Incandata sa luna cun s’arzola

est girende sas tancas sola sola

in mesu a unu campu isconfinadu;

essere non s’intendet animadu

chi movet innu sutta sa ‘iddìa.

Aradu non bi nd’hat ne messadorza

istanotte in sas tancas de su chelu,

e nemmancu si notat unu ‘elu

ne lacanas ne muros de tramesu:

est unu padru mannu estesu estesu,

tot’una immensa, infinida cunsorza.

In cussas tancas den esser in festa

ca b’est sa luna cun s’arzola manna;

sas istellas che giaos de sa gianna

sun sizidos a pare e poi b’hada

unu trainu a piena falada

chi rujat de su chelu sa foresta.

Ite bellas chi sunu cussas tancas!

Mancarri chi su frittu siat grae

non lu turbat su risu de cuddae

chi tenen in sas laras sas istellas,

ca sun che nie candidas e bellas

incantadoras, luzzigas, biancas.

Ma su frittu est troppu: ah, est biancu

su lagu, paret covaccadu ‘e nie!

si sighit goi fin’a fagher die

sos terrinos den parrer de cimentu.

A ue trabentadu s’est su ‘entu

chi non frusciat ne fozas movet mancu?

Cfr. BAINZU TRUDDAJU, Rosas e ispinas de Baldedu, Ivo Melis editore, Cagliari 1992, pagg. 77-78.