Benvenuto nel nostro sito, che si propone di fornire una finestra sul presente ed il passato del nostro paese. Ci auguriamo che le informazioni da noi fornite possano essere di tuo interesse.

de Istevene Demelas

No bi hat nues, sa luna est piena

fatende giaru in su chelu iscurosu

pro chie passat sa vida serena.

In paghe santa oras de reposu

ti astringhen che sanadora manu

chi sa vida apparir totu gosu.

Luzzigu sole in primmu manzanu

su chi nd'ischidada totu sas feras,

annunziendhe s'adoradu eranu.

Puzones bellos cun alas lezeras

chilchendhe cuddhu situ disizadu

populendhe a festa sas aeras.

Che pigat in su chelu indeoradu

iscaldende su samben'in sas benas

chena lu 'idere mai arrabiadu.

Amendhe fadas, ninfas e sirenas

sas grascias mannas nde sunu a ponente

a levante sol'odios e penas.

Su chi si narat Mediu Oriente,

sa chi fit unu tempus Terra Santa,

pro nois paret un’atera zente.

Terra de odios e de dolore affranta,

vidas segadas in sa gioventura

domos distruttas de sana pianta.

Sun coros frittos nieddhos che mura.

In su mundhu su sol'est un'ebbìa,

ma no b'est sa mantessi luzigura.

Inue regnat paghe e allegria

sos astros puru mandhan su sorrisu,

cun rajos indeorados de majia.

Su mundhu siat totue prezisu,

in dogn'oru sa paghe soberana

ìstrinet un intreu paradisu.

Terra de Oriente e Africana,

no biden una die luminosa,

nè abba buffan de frisca funtana.

Custrintos in sa pena dolorosa,

a odiare e sempre odiare,

ma sa idea est sempre disizosa.

...sos astros lugan pro totu che pare.

Cfr. Poesias de Istevene Demelas, Grafiche Essegi, Perfugas 2012, pagg. 80-81