Home » Limba Sarda » Brozzu Renzo » Cantu ti amo

Immagini del paese

Murrone janas 2.jpg

Statistiche

Tot. visite contenuti : 11322302

Notizie del giorno

 
Cantu ti amo PDF Stampa E-mail
Valutazione attuale: / 5
ScarsoOttimo 
Giovedì 30 Giugno 2016 09:35

di Lorenzo Brozzu


Fioriat sa 'ide

in sas 'innidas carres nostras

cando su sole de su 'eranu

nos ispozeit su chidrinu 'estire 'e latte.

Buliones de sentidos arcanos

han iscanzadu sa gianna 'e sos coros,

chi illuinados de accisu,

a manu tenta, hana giampadu

sa chijura 'e s'innozzenzia;

e s'avreschida 'e sos suspiros

abberzeit s'aidu a lagrimas de mele.

Jmbreagos de su presente,

no hamus olvidadu orizontes benidores

attraessende sas istajones,

assaborende su dulche e-i su ranzigu

de sonnios pendulende a mes'aera.

Sas umbras nostras,

a pinna de limba furchiddadas,

buffaian da-e su matessi cadinu,

bramas e gosos, penas e dolos,

sutta sa boveda isteddada 'e paghe.

Hamus semenadu tulas de isperas

e cando sas ispigas ammaduresin,

su telarzu 'e sos annos,

nos haiat già tessidu in sos chizos,

s'arazzu de sos frazados caminos.

Tanto fit giompida sa ua

e su licore nostru 'e gioventura

fit diventadu aghedu bulluzadu.

Ma oe chi sa 'ide est isfozida,

cando ispassizas in sa tanca 'e sos bisos,

deo, cun sos bios assussegados

chi riposan cun sa chijna 'e su passadu,

ti miro e una lagrima dulche de ammentos,

mi fuet, pro si fatare in su sinu tou

suspirende che derisa s'accua

"Umbra de s'umbra mia, sienda e ghia

de sos pidigos caminos de sa sorte,

sole de sas anniadas dies mias,

cantu ti amo; ah, cantu ti amo!"


1° classificato al Premio di poesia sarda CREI-ACLI, Sassari 1989

Cfr. Vintichimb’annos de poesia sarda CREI-ACLI de Sardigna, ed Gallizzi, Sassari 2014, pag.26

Ultimo aggiornamento Martedì 12 Luglio 2016 18:26
 

Aggiungi un commento

Il tuo nome:
Indirizzo email:
Titolo:
Commento (è consentito l'uso di codice HTML):