Desideriamo formulare ai nostri lettori tanti auguri di buona Pasqua.

di Bainzu Truddaju

Arrunzadu in d’un’oru ‘e sa tanca,

da-e su purpine iscortigadu,

ancora has sos signales, bezzu aradu,

de lotta dura e de arma bianca.

In sa terra ligada, tosta e crua,

non tremaiat su podere tou

de elighe attarzinu: a s’annu nou

fit totu pane sa fadiga tua!

Est guasi tocchende barant’annos

chi fisti vigorosu e chi fis biu,

cando fin totu forza e totu briu

sos boes iscanesos corri-mannos.

Fin boes chi a sa mia isbrionada

si faghian in bulvera in sa tira,

prìte sa ciarra, boria e ira

cheriat tribulende cumpensada.

Finas sas pedras iscorzolaias

cando a fagher pane fisti avezzu

e cumparias totu de unu pezzu,

chena mollare a sas iscossas mias.

A s’anda e torra ti ponia fattu

e non tenia vint’annos ancora,

ma cando in manu ti tenio, in s’ora

ti giraia che unu sedattu.

Ischeletridu e cun su purpuine

ses como, consumendeti su male.

Pares nende su diciu ‘e sa morale:

“Dogni cosa in su mundu andat a fine!”.

Ma deo puru non so’ che a cando

ti giraia che pinnizzu ‘e lana:

s’andanta tenzo timida e mezzana

e reu a malappena isto e ando.

E tue puru non giuas piusu

a laorare e sulcare in sas benas:

sos annos, s’abbandonu e-i sas penas

t’han resu ischeletridu e foras d’usu.

Aradu, amigu caru ‘e pizzinnia,

che tue so’ pieno ‘e affannos:

ma m’ammentas sos boes arri-mannos,

s’ardore tou e fantasia mia.

Cfr. BAINZU TRUDDAJU, Rosas e ispinas de Baldedu, Ivo Melis editore, Cagliari 1992, pagg. 113-114