Home » Limba Sarda » Truddaju Bainzu » Sa lagrima

Immagini del paese

MVC-003F.JPG

Statistiche

Tot. visite contenuti : 5688858

Notizie del giorno

 
Sa lagrima PDF Stampa E-mail
Valutazione attuale: / 3
ScarsoOttimo 
Lunedì 09 Gennaio 2017 21:09

di Bainzu Truddaju


T’avvias da-e s’intimu ‘e su coro,

attraessas sa mente tota canta

e t’acceras in ojos bella e santa,

tunda che una perla ‘e lentore

cristallizende finas su fiore

in sos friscos manzanos tintos d’oro.


Calmas in parte su destinu tortu

e addulchis sas penas cando ferit

inumano dolore o cando perit

s’isperanzia bella: si sinzerat

s’oju cun tegus e ti cunsiderat

forte in sa gioja, manna in s’iscunfortu.


De cantu ses sensibile e ses forte,

fin’a su pius duru prepotente

toccas su coro, sa timida zente

t’hat che perla in ricramos de campagna,

de ogni parturente ses cumpagna

e fiza manna ‘e sa signora Morte.


Finas su ‘oe, si faghet abboju

de ue ruet su simile sou,

linghet sa terra, tristu faghet prou

de s’isfogare in rantulos[1] de gherra.

E in tanta penosa cuntierra,

raspit[2] e ruspat[3] a lagrima in oju.


Tue sullevas s’omine in sa gherra

e-i sas mamas ch’han perdidu benes

de fizos: las poderas e sustenes

in sos duros perigulos de vida

e ses che un’istella bianca e nida

naschende in s’oju e codulende a terra.


De suore e de sambene fadiga,

difesa ‘e s’indifesa criadura,

perla de s’isposina casta e pura

cando a su chi solet istimare

giurat amore in pês de un’altare

cun fide cristiana pius antiga.


E chie non ti usat nara e chie

in cust’adde de piantu e tribulias?

Deo puru in sas tristas penas mias

ti sento umidendemi su visu

dogni tantu. Ah, fina in paradisu

santos e santas dên haer a tie!


Cfr. BAINZU TRUDDAJU, Rosas e ispinas de Baldedu, Franco Melis editore, Cagliari 1992, pagg. 68-69.

 


[1] Rantulu: ciunciu, lamentu.

[2] Raspu: ticchirriu porosu, corroghinare.

[3] Ruspare: su raffiare chi faghet su ‘oe in terra cun sos pês e cun sos corros.

Ultimo aggiornamento Lunedì 09 Gennaio 2017 21:18
 

Aggiungi un commento

Il tuo nome:
Indirizzo email:
Titolo:
Commento (è consentito l'uso di codice HTML):