Home » Limba Sarda » Truddaju Bainzu » In sa campagna mia

Immagini del paese

Castello 39.JPG

Statistiche

Tot. visite contenuti : 5022432

Notizie del giorno

 
In sa campagna mia PDF Stampa E-mail
Valutazione attuale: / 3
ScarsoOttimo 
Lunedì 10 Aprile 2017 19:47

di Bainzu Truddaju


Ite bellas cantilenas

chi falan da-e sa runda

de cust’adde pilibrunda

pro m’addulchire sas penas.

 

Milli chilandras in festa

ballan in chelu cantende

e in naes murmuttende

b’est s’imperu ‘e sa foresta.

 

Badde mia delicada,

cantu m’ammentas sos annos

de cando cun passos mannos

da-e me fis coronada!

 

Badde bella, a manu tenta

m’has bidu cun mamma mia

cando minoreddu fia

che birde foza ‘e menta.

 

Como so torradu a tie

bezzu mannu e barvi canu

comente cando cun sa manu

mamma daiat a mie.

 

Ite caras, ite bellas

sas tuas alvures santas:

altas fruas de piantas

paren tocchen sas istellas.

 

E in mesu ‘e sas naes,

filumenas cantadoras

cantan cun boghes canoras

tra milli razzas de aes.

 

Sempre fisti e sempre sese

nidu de dulzes puzones

e tintinnos de masones

de intender no arrêse.

 

In custos oros de rios

fit su chelu indisturbadu

de unu mundu fadadu

pro sos antenados mios.

 

Cun amorosos impignos,

frueddas bezzas e noas

de chercos, laros e toas

sempre dadu t’han carignos.

 

Tue ‘adde bidu m’hasa

immannittare che lizu.

Azzetta de unu fizu

cust’immagine romasa.

 

 

Cfr. BAINZU TRUDDAJU, Rosas e ispinas de Baldedu, Ivo Melis editore, Cagliari 1992, pagg. 38-39.

Ultimo aggiornamento Lunedì 10 Aprile 2017 19:52
 

Aggiungi un commento

Il tuo nome:
Indirizzo email:
Titolo:
Commento (è consentito l'uso di codice HTML):