Home » Limba Sarda » Truddaju Bainzu » In su sonnu

Immagini del paese

castello8.JPG

Statistiche

Tot. visite contenuti : 5563038

Notizie del giorno

 
In su sonnu PDF Stampa E-mail
Valutazione attuale: / 4
ScarsoOttimo 
Giovedì 27 Luglio 2017 00:00

di Bainzu Truddaju


Millos sos mannos mios campagnolos

attraessende pasturas e tancas,

in berrita, in fusile e-i sas ancas

imperriadas in puddedros bajos,

tra cantos de pastores e messajos

e murmuttos da abes e rizolos.

 

Su monte de ricramos est bestidu,

sas fadas giogan in s’unda ‘e su riu,

tra s’allegru e suave murmuriu

de sas abbas currende a su pendente:

su manzanu est dulche e risplendente

simmai in vida tua nd’hapas bidu!


Sos traos sun a borridas ruspende

e ponzende in dellirios su logu,

sos puddedros a brincos e a giugu

faghene festa in s’incantu ‘e su saltu;

sas chilandras in chelu in altu in altu

dogni iscera ‘e cantu sun fattende.


Millos sos mannos mios coloridos

e in palas lis pendet sa berritta:

balla balla si godin s’aeritta

chi falat gioghittende da-e montagna.

Ite bella ch’est oe sa campagna,

tota piena ‘e ciulos e nidos!


Ite bellos chi sun sos mannos mios

subra 'e caddos fortes e lezeros!

De tipu paren chi sian severos,

però han coro ‘onu: a riguardu

han su tipu ‘e s’antigu omine sardu,

de paga ciarra e movimentos bios.


Faeddana de cando han postu paghes

duos chi fin trint’annos inimigos,

de usos e de odios antigos,

de festas campagnolas, de tusorzos,

de incunzas pienas, de laorzos

e de domos da fadas e nuraghes.


Faeddan puru ‘e cando ingropperados

passaian in baddes solianas

cun sabias piseddas risulanas

bestidas a s’antiga e in su tuju

una bella collana ‘e oro ruju

e in pettus fremmaglios delicados.


Ite bellos chi sun a caddu in sedda

sos mannos mios! Totu su manzanu

trottende sun a redinas in manu

in campos de fiores profumados:

sos caddos cun sos zocculos ferrados

cazzana fogu in sa pedra niedda.

 

Cfr. BAINZU TRUDDAJU, Rosas e ispinas de Baldedu, Ivo Melis editore, Cagliari 1992, pagg. 53-54

Ultimo aggiornamento Venerdì 28 Luglio 2017 17:02
 

Aggiungi un commento

Il tuo nome:
Indirizzo email:
Titolo:
Commento (è consentito l'uso di codice HTML):