Home » Limba Sarda » Cossu Lucio » Lucio Cossu: Frunzas de attunzu

Immagini del paese

IMG_2878.JPG

Statistiche

Tot. visite contenuti : 6992819

Notizie del giorno

 
Lucio Cossu: Frunzas de attunzu PDF Stampa E-mail
Domenica 06 Luglio 2008 01:00

L’autore ha dedicato questa poesia a un giovane pastore, assassinato da ignoti a Chiaramonti nel 1971, ai suoi bambini e, in genere, a tutti i pastori. Vuole essere, questo, un messaggio di pace universale.

Cliccando qui è possibile ascoltare la poesia recitata dall'autore.

---

L'ana mortu cun s'anzoneddu in brazzos;

che preideru cun s'ostia in su sagradu,
intro sa mandra intinnida de brunzos
e de isgramos pro su martire 'e sa die.

 

L'ana mortu imbenujadu in cuss'altare,

beneighende chitulanu cussas lamas,
sulzidas de mufore e frittulidas
pro sas aeras ruttas in s'arroccu.

L'ana mortu cun sa cannada a istola
e cun ruzos paramentos de frustanu,
pius tetteros che roccu, a sos astraos
e a sas abbas bundantes attunzinas.

L'ana mortu sinnendelu in su latte
ancora caldu de umores colostrinos;
che nie biancu, ma pius biancu e saliosu
e pius santu de s'ozu 'e s'ultimera.

L'ana mortu affianzendelu a sa terra,
mama cara de lughes e de sonnos,
subra frascas e fozas ingroghidas,
cumpagnas de s'attunzu ch'est morzende.

Frunzas de un'attunzu paliadore.
Paliadore de uncas, de neula e sestadore
de biaittas traucas senz'orizu.
E bois, veras a nieddu 'estidas
chi sulcades da-e su nidu
a sos bolos sos pius mannos,
in costante giraolta cussos chelos
a bois amigos pius che a sos mortales,
unu pregu giughide a cussas chimas
dai custa muridina ancora calda
de lampos e de rantulos de morte.

Vergine Santa,
che reu sinnadu a fogu a tie l'intrego;
e tue, piedosa, abbojalu a caminu.
Apporrili sa manu chi, cumpridu,
una bertula piena t'est battende
de pizu ostadu a sambene cundidu.
Tue chi ses giamada, in custas baddes,
De lagrimas Signora e de altu dolu,
da-e sos chelos pius limpios e serenos,
ue ses pinta cun lamas in su coro
e cun nieddos ricamos de vellutu,
sas alas tuas pinnidas de grascias
isparghe lastimosa in sos cuiles
e in sas roccas calpidas da-e su male.

Imbene sacra,
tue chi ses sa mama
de sas pettas cariadas da-e sas lanzas
e reina in sas ispinas de su mundu,
si fiorire non podes in sas laras
sa dulcura 'e sos basos de una ia;
s'iscanzare non podes su piantu
ch'in risu si 'oltaiat a sas istrintas
de sos brazzos istraccos da-e sa mandra;
si cumprender non podes sos ispricos
chi su babbu isolviat in su faeddu
gai dèchidu e aspru 'e sa montagna;
e si diversu nd'ad'a esser su limbazu
chi da' Illorai nde fiorit in s'Anglona,
tue cunzedi a chie ti pregad'in cust'ora,
cun sentidos de mama disaurada,
sa forza de torrare a chiz'asciuttu
sos mantessis abbrazzos e carignos
ai cussos sorfaneddos, chi sos trattos
de su babbu ancora chircana in tott'ue,
in su fagher'amigu 'e ogni istranzu
e in sos ojos piedosos de ogni zente.

Aggiualos, o santa, in custa vida,
a giogare felizes che anzoneddos
e a contare sos fiores, sas isteddas,
cun tottu sos profumos, sos lugores;
cun tottu sos colores, sos incantos,
pro chi potat continu ismentigare
su ruinzu 'e sas istrinas de Nadale;
o su ischidu sabore 'e-i cussu pane
da-e su pettu ammoddigadu in cussa mesa.
Sinnalos tue che mama in cussa rughe,
da-e mill'annos e piusu sempre rea
in su monte 'e sos impidos e airados
contrachelos e frades innozentes;
e sian'issos sos pignos de ogni paghe
e siat pignu de perdonu su dolore,
pro chi potat isfogare su trainu
sas abbas buluzadas da-e ogni poju
a su mare 'e sos triunfos de s'amore;
pro chi potat allugher custu sole
cun fîamas de martiriu su pius santu,
ogni sardu pastore ventureri.

Laorada da-e sos rios de su suore,
brujada da-e sos caldos de s'istiu,
frasellada da-e sas attas de s'ijerru,
murrunzada in su sinu da ogni aimuttu,
frastimada in sos montes da ogni parte.

(1971)


 

Ultimo aggiornamento Mercoledì 13 Giugno 2018 13:06
 

Aggiungi un commento

Il tuo nome:
Indirizzo email:
Titolo:
Commento (è consentito l'uso di codice HTML):