Home » Limba Sarda » Truddaju Bainzu » In su riu

Immagini del paese

Giardini pubblici 2006a.JPG

Statistiche

Tot. visite contenuti : 9567054

Notizie del giorno

 
In su riu PDF Stampa E-mail
Valutazione attuale: / 5
ScarsoOttimo 
Venerdì 19 Febbraio 2021 19:02

di Bainzu Truddaju

I

noghe a pês a modde sas bajanas

como barantachimbe o chibant’annos,

samunaian de linu sos pannos

e bestires e mantas e suttanas.

 

Tando fin populadas sas campagnas:

su ‘acchile, s’appittu e-i s’arzola

fin s’iscasciu ‘e sa zente campagnola

cun baddes e costeras e muntagnas.


Lezeros passaian e cun briu

sos pastores de ‘amas e baccarzos;

so’ inogh’in custos bellos tinniarzos

cantende a tota forza a boghe ‘e riu.


Ma ancora che a tando s’abba bella

s’avviat murmuttende a cara a mare:

solet feras e baddes ischidare

sa sua dignitosa parentella.


Sas fadas in su sou murmuttare

tessen randas de seda in s’unda netta,

e in sa pius pasida e chietta

ballan a ballu tundu a man’a pare.


Est un’incantu in s’incantadu ‘eranu,

cando sas abbas cun sa cantilena

attraessan gioiosas pedra e rena

truvende a mare pianu pianu.


Sas frascas de sas baddes e costeras

de fiores campinos si circundan;

subra sas baddes sos chercos intundan

silenziu de antigas camineras.


Fis un’incantu amenu ‘e poesia

cando fis, riu caru, travigadu;

ch’hat puru in custas abbas samunadu

sa bon’anima e cara mama mia.


Tando fis, riu,  che perel’e oro

pro totu sos messajos e pastores,

e deo como, in lista ‘e sos mazores,

ancora che a tando t’hapo in coro.


Si che torro, istimadu riu meu,

t’hap’a fagher calch’ateru regalu,

chi già non est pro tenner coro malu,

ma anzis mi sullevas su peleu.

 


Cfr. BAINZU TRUDDAJU, Rosas e ispinas de Baldedu, Ivo Melis Editore, Cagliari 1992, pagg. 132-133.


Ultimo aggiornamento Venerdì 19 Febbraio 2021 19:07
 

Aggiungi un commento

Il tuo nome:
Indirizzo email:
Titolo:
Commento (è consentito l'uso di codice HTML):