di Bainzu Truddaju

S’abe bella muizat in su moju

fattende a reja mele puzoninu,

sos fiores li porrin a caminu

pastura dulche e delicada chera;

ballana sos puzones in s’aèra

in altu in altu a cantu arrivit oju.

Han tramula sos chercos e olias,

chi sunu sos zigantes de sas costas:

sas bamas paschen a rodeu postas,

tra tappulas e rodas de trovozu:

in renes e in lumbos gighen ozu

e-i su latte bogan a labias.

In su cuile, inue sos pastores

sun coghende s’anzone, in altu in altu

est pighende su fumu e in su saltu

giannittana sos canes fattu a fera;

un’ariedda lezera lezera

basat e innamorat sos fiores.

Beranu, tue ses su regnu santu,

incantadu de ninfas e de fadas;

su poeta terzinas e ottadas

t’intrizzat cun su coro mannu mannu.

Torrende cun sas grascias c’has, dogn’annu

torrat sa melodia e-i su cantu.

Su riu a murmutteddu, a boghe lena,

su notte paret musica divina,

cando sas abbas fin’a sa pischina

falana gioghittende in s’adde oscura

e in chelu che sindria madura

s’idet pighende sa luna piena.

Baccas ispanas, murinas, biancas

chi luzzigan coment’e pinnadellu,

gighen sa titta cantu s’istarellu

cun sos cabijos longos a s’archile:

recuini sos seros a bacchile

a istiga ‘e latte da-e sas tancas.

Cfr. BAINZU TRUDDAJU, Rosas e ispinas de Baldedu, Ivo Melis editore, Cagliari 1992, pagg.63-64.

La foto è di Mario Unali