Sos fiores sun signu ‘e bellesa,

chi abbellini campos e pasteras,

giardinos, ortos, cortes, camineras,

dende a su mundu un’atera ricchesa.

Da ch’est totu su logu fioridu,

issos ti naran: ch’est sa paghe amena!

Paret chi seghen russa ‘ogni cadena

sos donos chi sa terra hat partoridu.

Sun signale de fruttos benidores,

signales de carignos e de affettu;

cando su coro ballat in su pettu

pro amore, faeddan sos fiores.

In silenziu allegran d’ogni nidu,

no traighen su bonu sentimentu;

paghe e amore, est custu su talentu

ch’in mundu cosa mezus no s’hat bidu.

Pro s’Elicona corona de laros,

in campusantu cuddu crisantemu,

accumpagnende su saludu estremu

chi damus nois a totu sos caros.

Est’in fîore sa giovana vida,

brilladora che lughente istella;

est su ‘Eranu s’istajone bella,

est bella ca est totta fiorida.

Ma b’hat fiores cobertos de oro

chi mantenen’allegru si giardinu;

sun fiores chi naschen’in sinu,

vellutadas sun sas fozas insoro.

Lassan su coro pienu ‘e orgogliu

e-i sa domo garriga ‘e fastizos:

sunu petalos de biancos lizos,

sempre friscos de raru germogliu.

Custu mundu de varios colores,

grogu, nieddu, biancu e ruju,

semus ispigas intro su mannuju

chi bi nd’hat ingranidas e minores.

Chie restat in basciu, chie in altu,

distinghende su bellu e-i su feu;

ma sun fiores bellos totu arreu,

ca pro sa mama no bi nd’hat iscaltu.