Desideriamo formulare ai nostri lettori tanti auguri di buona Pasqua.

n bidda mia no bi sun piusu

sos impedrados a pedra assentada.

In sas carrelas signale non b’hada

de pedra: de cimentu b’had’abusu.

Sa zente mì est ancora a s’antiga,

faghet pro totu s’annu sas provvistas.

Pastores e messajos e artistas

serenamente affrontan sa fadiga

e totu sos umìles mestieris

chi faghimus cun tanta onestade,

fatende operas de caridade

chi sos mannos dettadu nos han deris.

Ognunu in bidda sua est cavaglieri,

in bidd’anzena est chi miseru parat.

Gai est chi su diciu antigu narat,

finas si azzettu est su furisteri.

Inoghe faghen sosta sos amigos,

calcunu si trattenet tota vida:

trattamus bene sa sa zente accudida,

sa ‘idda mia no hada inimigos.

In bidda mia s’aria est pulida,

profumada ‘e rosas in beranu;

lughente s’aurora su manzanu

a tonos naturales colorida,

chi rendet saboridas sas pasturas

pro sas bamas de rampu e lattosas;

zona d’alvures e tuppas umbrosas,

totu est bellu tra campos e alturas.

Inghiriada ‘e nuraghes massissos

chentudegheotto sun preziosos,

regnu de misterios e de bisos

paret sa vida sigura cun issos.

Ricca de chejas e baddes arcanas,

monumentos chi sun’in s’alta gloria,

chi aggiunghene una pagina a s’istoria;

rios e lagos e friscas funtanas

curren bundantes che sambene in benas,

dende forza a sa pagh’e a s’allegria.

Deo istimo s’amada ‘idda mia,

ma rispettende sas biddas anzenas.

Cfr. Poesias de Istevene Demelas, Grafiche EsseGi, Perfugas2012, pagg.33-34.