Home » Limba Sarda » Truddaju Bainzu » Istanotte passizo in s’infinitu

Immagini del paese

Statua Santa Caterina 1.JPG

Statistiche

Tot. visite contenuti : 11017975

Notizie del giorno

 
Istanotte passizo in s’infinitu PDF Stampa E-mail
Valutazione attuale: / 3
ScarsoOttimo 
Giovedì 29 Aprile 2021 10:21

di Bainzu Truddaju


Istanotte passizo in s’infinitu

tra nues e lampizos de aèras,

ue viven zigantes e chimeras

de su poeta in su regnu biaitu.

 

Mì sa luna piena posta in festa

tunda che una corvula de upa,

mì sas istellas cun ojos de lupa

accurzu ‘e pare in s’immensa foresta!


Non si che ‘idet muros de tramesu

ne lacanas in totu custas tancas;

de sa luna sas linias biancas

illuminant su mundu attesu attesu.


Non ch’hat lupos, leones ne astores

chi persigana bamas o columbas:

sonan totue armoniosas trumbas

tra ricamos de ‘irde e de amores.


In sas baddes ch’hat elighes de coro

cun nidos de picciones e de aes

e in mesu a fozas e a naes

moderinas de platinu e de oro.


Sas bamas in sos campos biancas nidas

gighen lanas de sedas e de rasu

e non bidides fiadu romasu

ca de pasturas bonas sun nutridas.


Est totu poesia in custas serras

inghirlandadas de massissa paghe:

imbidia non ch’hat ne faghe faghe

de minettas, de triulu e de gherras.


Tot’est bellesa, cantigos d’’eranu

biancuras de chelu a non finire:

sa notte cantan fadas in bestire

a tota ‘oghe fin’a su manzanu.


Ite logu fantastigu e pienu

de giardinos de rosas e de lizos!

Da-e subra ‘e terrazzas e passizos

sas ninfas ballan a chelu serenu!


Bastat, anima mia, esulta intantu

ch’has bidu custas magicas iscenas

e nara puru in sas baddes terrenas

ch’inoghe non esistit su piantu.

 


Cfr. BAINZU TRUDDAJU, Rosas e ispinas de Baldedu, Ivo Melis Editore, Cagliari 1992, pagg. 163-164.


Ultimo aggiornamento Giovedì 29 Aprile 2021 12:13
 

Aggiungi un commento

Il tuo nome:
Indirizzo email:
Titolo:
Commento (è consentito l'uso di codice HTML):