E' possibile esprimere un voto sul gradimento degli articoli da noi proposti. Ti invitiamo ad esprimere un tuo giudizio e vedere i giudizi degli altri lettori.

(Babbos de tando)

“Est tempus de messera, fizu amadu,

lea sa falche e a su pezzu tucca;

afferra pane e pone abba in sa zucca

e bae, messa su trigu ingranidu.

Issu nos dat su pane saboridu,

su pius alimentu imbidiadu.

“Si contivizas e andas chitonzu,

fizu caru, e ch‘ogas sa fadiga,

s’indeorada e prosperosa ispiga

ti pagat su tribagliu ‘e s’annu intreu.

Anda, ponemi mente, fizu meu,

e batti a finitia su messonzu!”.

Su messaju, chi fit messaju abberu

e de sentidos totu saba e mele,

narzende gai faghiat fidele

si fizu in sas fadigas de unu pezzu;

anzis, poniat fattu, bezzu ‘ezzu,

pro ‘ider si in sa raglia fit sinzeru.

“Como pius che prima non si sinnan

innanti su tribagliu ‘e incominzare:

cand’eo fio a tempus de messare

mi sinnaio in sa prima manada.

Religione che tando pius non ch’hada

pro sas ispigas chi santas si ninnan!

“Fizu, non timas fadiga peruna,

affronta su tribagliu, già ses mannu!

Si nde messas su trigu chi occannu

est isettende a nois reu in canna,

hamus a fagher un’arzola manna

cantu sa ch’hat in chelu sa luna.

“Fizu meu istimadu, su ‘asone[1]

de Antoni Luisi est preparadu

pro triulare su trigu messadu.

Poi, si Deus cheret ch’andat bentu,

subra su liju e luzzigu pamentu

bi faghimus de oro unu muntone!”.

Sun peraulas santas de s’antigu

omine, dignu abberu ‘e sa berritta,

cando in sa messera beneitta

de falches amaiat s’arrejonu

e-i su fizu pretendiat bonu

in sas duras fazzendas de su trigu.

Cfr. BAINZU TRUDDAIU, Rosas e ispinas de Baldedu, Ivo Melis editore, Cagliari 1992, pagg. 82-83.

---

[1] ‘asone (basone) fit su gruppu de caddos chi triulaiat si trigu.