Invia una email a famigliapatatu@gmail.com per farci sapere un tuo parere sul nostro sito

di Bainzu Truddaju

aminade, caminade

e leade sos triuttos:

de sa fadiga sos fruttos

hamus già bell’e in manu.

Millu brinchende su ranu

a su passazu infogadu

de su zocculu ferradu:

caminade, caminade!

S’ebba ‘e corru est in bolu

tota canta manna die:

in fiancos giughiat nie

de suore e de fadiga.

Est in bulvera s’ispiga,

non b’hat mancu cuguzadu;

su sede est totu pistadu,

de ‘entulare hamus solu.

Millos sos ranos de oro,

feminas bellas battide

sos chiliros e pulide

su pius bonu alimentu.

Ancu nde fattemus chentu

de incunzas goi bellas:

ch’alzat fin’a sas istellas

sa cuntentesa ‘e su coro!

Distaccade su ‘asone

e pulidelu ‘e sa pula,

ponidechelu in s’istula

a pascher a contu sou:

como est a s’annu nou

pro chie s’agatat sanu.

Ajò pianu pianu

chi formamus su muntone!

Ischirighia!, comare,

bellos sos ranos bolende,

da’ sa paza seberende

e brinchende in sa codina.

Prestu hamus haer farina

e pane nou in sa cascia:

Deus nos fattet sa grascia

de nos cojuare umpare!

Cfr. BAINZU TRUDDAJU, Rosas e ispinas de Baldedu, Ivo Melis Editore, Cagliari 1992, pagg. 84-85.