di Bainzu Truddaju

In sas nottes de ierru,

cando inscrispit sa tempesta,

puzones de sa foresta

s’intuppin in s’aliderru.

In su chercu, in sos ozastros

s’intanan puru a chimentu

de pibios, abba e bentu

timende da-e sos astros,

pro ca mustrana disastros

nues in colore ‘e ferru

ch’in mesu insoro han inserru

frittas, tempestosas undas,

isgarrighende in sas rundas

in sas nottes de ierru.

Cantas boltas hapo ‘idu

su ‘ostru frittu isconsolu,

a trumadas lende ‘olu

sutta su chelu incrispidu

e cun lamentu sighidu

timende s’ira funesta.

Notte fea e disonesta,

cantu affannu in coro pones

a bolatiles puzones

cando incrispit sa tempesta!

De t’amare non b’hat coro

pro puzones e pro aes

e si perden in sas naes

raspas e ciarras insoro.

Finas deo m’addoloro

cun oriolos in testa

cando a manca e a dresta

bos bido chirchende vida

in calchi tuppa fozida,

puzones de sa foresta.

Cussas bostras chistiones

de affannu e de tristura

ponen finas pena dura

a pastores e masones.

Cantilenas e cantones

cando chircades guerru,

sun chimeras de inferru

ch’issos puru proan tando

pro sos bostros bolos cando

s’intuppin in s’aliderru.

Cfr. BAINZU TRUDDAJU, Rosas e ispinas de Baldedu, Ivo Melis Editore, Cagliari 1992, pagg. 155-156.