Home » Limba Sarda » Demelas Stefano » Su mare

Immagini del paese

Ch arcobaleno 2.JPG

Statistiche

Tot. visite contenuti : 9981746

Notizie del giorno

 
Su mare PDF Stampa E-mail
Valutazione attuale: / 3
ScarsoOttimo 
Martedì 16 Novembre 2021 13:30

di Istevene Demalas


De battor partes ti nde leas trese

de s’universu intreu e infinitu,

pro narrer cantu mannu e riccu sese.

 

Chena numeros sun sos chi s’abitu

han’in s’intragna tua illacanada,

funguda e de colore biaitu.


De tancas e cunzados no bi nd’hada,

liberu e abeltu a battor bentos,

distintu e de bellesa incantada.


Intr’e a tie bi sun sos ammentos

de marineris chi tot’han lassadu,

cun sa vida, intreos bastimentos.


Cantos tesoros in sinu has cuadu

a s’omine chi tenet bramosia;

mischinu chie non t’hat rispetadu.


Costois sempre cudda galania

cun fauna e flora; una fortuna

cuntzedis, ma no atzetas balentia.


Mudas sos movimentos tot’in d’una,

chi apparis severu e furiosu,

t’altzas e falas segundu sa luna.


Mudu, incantadore e ingannosu

de chie chilcat segretos arcanos,

pro sos ojos umanos maestosu.


Divisu in tres mannos oceànos,

netzessidade de linfa vitale

da-e mizas de seculos lontanos.


Restas de ogni vida su signale,

reposas in eternu e mariolas

sa terra ch’est su tou cabidale.


De pische sunu mannas sas alzolas,

alimentadas in manera sana,

su restu tot’a fora che l’imbolas.


Pasidu a sa die soliana,

s’ispijat su colore de s’aera,

sa paghe santa ti regnat sovrana.


Cun maestria superba e fiera,

sempre ti moves e mai t’arrese,

s’aria mala la torras lezera.


De battor partes ti nde leas trese.



Cfr. Poesias de Istevene Demelas, Grafiche EsseGi, Perfugas 2012, pagg. 74-75.

Ultimo aggiornamento Mercoledì 17 Novembre 2021 18:21
 

Aggiungi un commento

Il tuo nome:
Indirizzo email:
Titolo:
Commento (è consentito l'uso di codice HTML):