Home » Limba Sarda » Truddaju Bainzu » Ninna Nanna

Immagini del paese

Chiaramonti panorama 11.JPG

Statistiche

Tot. visite contenuti : 9981745

Notizie del giorno

 
Ninna Nanna PDF Stampa E-mail
Valutazione attuale: / 4
ScarsoOttimo 
Giovedì 16 Dicembre 2021 18:52

di Bainzu Truddaju

Ninna nanna, pupa bella,

non t’assusten sos dolores

e chimeras e rancores

da-e mente che cancella.

 

Dormi, prenda preziosa,

s’amparu ‘e sos mannos tuos;

cussos ojos tot’e duos

sunu che fozas de rosa.

 

Dormiti, bandela mia,

istella ‘e babbu e de mama,

s’adorabile fiama

chi calmat sa pena ‘ia.

 

Cando t’hat in coa nonnu

dormendeti, rosighedda,

tue cun sa maninchedda

li tiras s’arva in su sonnu.

 

Dormiti! Sas penas mias,

si t’ido calma dormende,

si ritiran cuitende

e torran sas allegrias.

 

Dormi, prenda, ninna nanna,

sas siendas de su mare

si m’agato t’hap’a dare

daghi ses bajana manna.

 

Dormi cun sonnos de oro

e ti fattan cumpagnia

fadas de s’isola mia,

santas de anima e coro.

 

Cussas laras delicadas

parene movende appena

una dulze cantilena

de istorias passadas.

 

E chie pius de te

est fortunada in su mundu

cando cun su visu tundu

su riposu ‘enit de sé?

 

Bastat, tristas cantilenas

non t’attristen in su mundu:

dormi como a pilu brundu

tra sas glorias terrenas.

 

 

Cfr. BAINZU TRUDDAJU, Rosas e ispinas de Baldedu, Ivo Melis editore, Cagliari 1992, pagg. 136-137

 

Ultimo aggiornamento Giovedì 16 Dicembre 2021 18:58
 

Aggiungi un commento

Il tuo nome:
Indirizzo email:
Titolo:
Commento (è consentito l'uso di codice HTML):