Home » Limba Sarda » Truddaju Bainzu » Ammentos de pizzinnia

Immagini del paese

Ch panorama 29.JPG

Statistiche

Tot. visite contenuti : 11018053

Notizie del giorno

 
Ammentos de pizzinnia PDF Stampa E-mail
Valutazione attuale: / 3
ScarsoOttimo 
Domenica 30 Gennaio 2022 19:11

(Littera a un’amigu)

di Bainzu Truddaju

 

Cantas dies passadu hat da-e cando

cun tegus brincaia a s’ancallitta?

E in sos rios cubas de abba fritta

cantu bi nd’hat faladu da-e tando?

 

Paret deris de cando chircaimus

nidos de sorigheddas, franbainzos

e cando in sa costera de Sambinzos

su notte in su barraccu corcaimus.

 

Sos piseddos de tando sunu mannos,

currende a faccia a morte a s’isfrenada,

e sos chi fin in edade avanzada

che sun già in su chelu tantos annos.

 

Tres quartos de vida, salvu errore,

nos hamus mandigadu  o fattu fuere,

ca dogni cosa est destinada a ruere

pro legge naturale ‘e su Signore.

 

Dae sessanta che so’ già ‘essidu

e fatto che a tie brou ‘onu:

sa robba ‘ezza tenet cussu donu

da fagher pastu ‘onu e saboridu!

 

It’hamus de pretendere a sa vida?

Pedire non podimus ne chircare,

ca non devet torrare a cominzare

una cursa chi contat già finida.

 

Ma si b’hat de pedire calchi cosa,

deo pro contu mei dia cherrere

chi nessi a sa ‘ezzesa pota isterrere

s’andera in d’una via deliziosa.

 

Ismentigare, ismentigare arreu

sos annos de sas tristas penas mias:

affannos e penosas maladias

chi a mie puru regaladu hat Deu.

 

E poi currer, currer a inie

a ue babbos nostros sun andados,

a ue semus totu destinados,

però siat lontana cussa die.

 

Bastat, amigu caru, istati sanu,

a crebu de su lentu andare insoro

chi faghene sos annos. Da-e coro

t’abbrazzo astringhendeti sa manu.

 

 

Cfr. BAINZU TRUDDAJU, Rosas e ispinas de Baldedu, Ivo Melis Editore, Cagliari 1992, pagg.111-112.

 

 

 

Ultimo aggiornamento Lunedì 31 Gennaio 2022 11:03
 

Aggiungi un commento

Il tuo nome:
Indirizzo email:
Titolo:
Commento (è consentito l'uso di codice HTML):