Benvenuto nel nostro sito, che si propone di fornire una finestra sul presente ed il passato del nostro paese. Ci auguriamo che le informazioni da noi fornite possano essere di tuo interesse.

di Istevene Demelas

Sa muzere ‘e s’amigu est cosa rara

chi che issa bi nd’hat pagu dotadas,

ca leat su maridu a isugnadas

e nde li zappat sa pedde ‘e sa cara.

Deris chi l’happo ‘idu tottu afflittu,

m’hat nadu: “Ite pessas de a mie?

Oe hamus brigadu a mesudie

e m’hat fattu cust’oju biaittu”.

L’happo rispostu: “Cantu faghes pena,

giagarachela a su destinu sou,

ca, si ti giompet da-e bellu nou,

ti masellat in tota sa carena”.

Sos amigos de fora no bi crêne

chi est trattadu male a cussu puntu;

isse cuntentu anzis m’hat aggiuntu

ch’est bella meda e la cheret bene.

Issa est lezera che sas ballerinas,

si movet lebia che-i una puma;

da-e  manzanu a sero fuma fuma

e su maridu faghet sas faìnas:

tapulat, mudat, samunat in terra;

istraccu paret chi no siat mai.

Ma daghi torrat issa est su guai,

sun duos puddos a su gherra gherra:

s’iscuden totu, vasos e piattos

e totu su chi capitat in manu;

ma cando mai unu cristianu

happat sempre sos contos male fattos?

Su die andat a sa zoronada,

suerende su pane in cara anzena;

si la preguntat “Ite has fattu a chena?”,

si airat che una cane anzada.

Si b’andan sos amigos, sos iscuros,

subito che los bogat da-e domo

e narat issa: “L’arrangiamus como

sa chistione, in sos battor muros!”.

E no la timet sa brutta figura,

ca sa idea est dura che pedra.

Issu hat sa neghe chi cun sa puddedra

hat isbagliadu totu in domadura.

Cfr. Poesias de Istevene Demelas, a cura di Azzurra Solinas e Roberta Demelas, Ed. Grafiche EsseGi, Perfugas 2012, pagg. 71-72.