Invia una email a famigliapatatu@gmail.com per farci sapere un tuo parere sul nostro sito

‘Ogni sero a primmu imbrunire

su grillu cantat cun boghe insistente,

cando s’amada, bella e attraente

chilcat su sonnu pro poder drommire.

Tando pasada in su bonu reposu,

la miro da-e pes finas a conca,

s’intendet da-e tesu una tonca

preziosa cun su cantu fastizosu.

Sa torrada ‘e s’alenu paret tale

a una frina chi carignat solu,

ismisuradu e ardente consolu,

chi alleviat dolore e ‘ogni male.

Poi chi leo sonnu, finas deo

paret de ‘ider sa mantessi cosa.

Est visione bella, maestosa!

No totu est beru, eppuru bi creo.

A primmu sustu, m’ischido ‘e nou:

la ‘ido sempre drommende serena;

in su silenziu s’intendet appena

e deo godo su reposu sou.

Zertas bortas sa luna intrat in domo,

cando su balcone no est tancadu.

Li rendet cuddu visu illuminadu,

ch’ischidadu e drommidu la fentomo.

Cando si movet, mi paret chi ‘olet,

cun sas alas de una mariposa.

S’in coro b’hat ferida dolorosa

Totu mi passat e nudda mi dolet,

assaccarrendemi de allegria

pro tota vida. Una cumpagna gai

mi donat gosu, chi no’ morit mai;

mirendela m’ispirat poesia.

Totu s’istiu, sa bella istajone,

sas nottes passo a issa pensende,

a s’impuddile s’intenden cantende

sas boghes raras de ‘ogni puzone.

Tand’abelzo sa janna e besso a fora:

cantones bellas e melodiosas

intendo; e tando ido duas cosas:

a “Issa” e-i s’incandu ‘e saurora.

Tzaramonte, su deghe de Austu de su 1993