Natale 2018 e Anno nuovo 2019

de Bainzu Truddaju

---

Ajò chi aggiunghimus, mente mia,

fiore vellutadu un'ater'unu

a sos chi postos bene in fila sunu

in sa pianta de sa poesia.

Ajò, ischida sa Musa prodìga

e faghela rimbombere in s'aéra,

pigala in altu lezera lezera

senza timer impodda ne fadiga.

Abbaida, b'hat casteddos de iscoberrere

in sas campagnas de sa fantasia

e ue est mama bella poesia

b'hat giannas e balcones de aberrere.

Nd'has fattu tantos fiores de giudu

o chi sian mischinos e turbados,

ma a dogni modu sun bene avviados

in s'istoria 'ia 'e su saludu.

Has fattu fozas pro so mannos mios

e has cantadu arados e pinnettas,

feminas in imbustu e in faldettas,

giuales, trigos, nuraghes e rios.

Has cantadu de s'omine balente,

Musa mia istimada cantu s'oju,

e hasa fattu 'ider calchi coju

chi fit in usu pro s'antiga zente.

E fiores ancora che nd'hat tantos

de iscoberrer e de 'ider bene,

inue totu sas fadas arrene

e ninfas coronadas da-e santos.

Cando 'ides sa mendula in fiore

cantala chi est bella a la cantare

e tenen puru s'aéra, su mare,

innos de poesia e de amore.

Has bidu mente mia no est ingrata

sa Musa e t'hat dadu su fiore;

no iseo s'hat simpatigu colore,

ma sa fadiga sua eccolla fatta.

Canta fadiga, cantu movimentu

hat su poeta in simbulu 'e difesa:

sempre est che pedidore a manu istesa

chirchende pro sa vida nutrimentu.

Cfr. BAINZU TRUDDAJU, Rosas e ispinas de Baldedu, Ivo Melis Editore, Cagliari 192, pagg. 33-34