E' possibile esprimere un voto sul gradimento degli articoli da noi proposti. Ti invitiamo ad esprimere un tuo giudizio e vedere i giudizi degli altri lettori.

di Bainzu Truddaju

“S’aera in s’orizu ‘e su monte

est ruja azzesa istinchiddende fogu:

sa notte est mala meda, in dogni logu

dêt esser frittu, abba, bentu e nie!”,

narzesit tiu Peppe a fine ‘e die

a unu fizu ch’haiat de fronte.

“Su tempus est isconzu! Carra linna,

fizu meu istimadu, sa rujura

ch’in sos montes fattende est de chijura,

est tempesta ch’isgarrigat frearzu:

pensa a tenner frunidu su linnarzu

pro poder iscaldire s’alapinna!”.

“Cando est goi s’aera est cosa mala,

l’ischit bene sa mia isperienzia

e nde sias de custu a connoschenzia

pro chi pentire non ti potas poi:

cando fia piseddu, in seros goi

recuio a cuile a linna a pala”.

Intantu sos puzones fin a bolos,

cominzat a pioer, a tronare.

In d’un’iscuta, che cambas de mare

si sun fattos pienos sos baddijos:

baccas, belveghes, porcos, crabas, bijos

chircaian riparu in sos chizolos.

In notte ‘e tempesta, frades mios!,

sos canes urulende, in su porchile

sos porcos a murrunzu, su cuile

tremaiat a s’ira de sos tronos;

ite muida ‘e abba e ite sonos

chi faghian sas undas de sos rios!

Tiu Peppe, corcadu a pes a foghu,

narzeit a su fizu: “Ses bidende

chi a rujura ‘e su sole morzende

annunziat tempestas improvvisas?

Sas mias sun peraulas preziosas

E non las lês a risu, ne a giogu!”.

Cfr. BAINZU TRUDDAJU, Rosas e ispinas de Baldedu, Ivo Melis Editore, Cagliari 1992, pagg. 130-131.