Invia una email a famigliapatatu@gmail.com per farci sapere un tuo parere sul nostro sito

di Giovanni Soro

Custa poesia - ci scrive l'autore - apartenit a sos tempos lontanos.

Forsis est una de sas pagas qui at tonu religiosu. Est istada iscrita forsis in su 1955/56 e in sos annos lontanos l'apo fatu un'imbisita in gana de la metzorare.

Oe est cantada da-e su Coro Doria (de Zaramonte n.d.r.) e musicada dae su mastru famadu Moraccini.

M'as a narrer chi fi' puru tempus, ma "panta rei" e lassamus...

---

Salude a Tie

Salude a tie, istella,

mama de su Segnore,

istimadu fiore

de chelu, janna bella.

S'anghelu ti saludat

cun boghe soberana

e sa vilesa umana,

mama, pro te si mudat.

Sos peccados perdona

a totu sos mortales,

allontana sos males,

calmos beranos dona.

Namus pregadorias

a tie, pura mama,

pro nois ses fiama

in bolu 'e allegria.

Odios e rancores

fuan' da ogni coro,

lughet s'altu tesoro

e brillen' sos amores.

De chelu sas luguras

hamus forte disizu,

pro Gesus, s'almu fizu,

lassamus sas basciuras.

S'omine, poverinu,

diventet pius bonu,

pro te, in su perdonu,

nos frunat su caminu.

Aflittos, in piantos,

pentidos T'onoramus,

a Deus laudamus

unu e totu sos santos.