Ah, cantu tempus, caras baddes mias,
so' senza bos mirare a tota vista!
Sos males, sa 'ezzesa fea e trista,
de  iras carradora e de penas,
mi brivan de arcanas cantilenas
chi tenides tra dulzes melodias.

In su 'eranu meu beneittu
m'hazis  dadu carignos de ammaju;
incue babbu, mama, giaja e giaju
b'han tribuladu e ispesu fadigas
cando su sole isparghende sas rigas
fit in s'aéra a su primu risittu.

Cando penso a bois, baddes caras,
e bido cun sa mente sos colores
de truncos seculares, de fiores,
de abbas chi bos griglian in sos rios,
ruen e morin sos affettos mios
in sas bostras pulidas tintas giaras.

Sas pius bellas de totu sas bellas
sezis, o 'addes mias antigorias.
Ahi, cantas leggendas e istorias
tenides in intragnas cunservadas
de sas antigas epocas passadas
lughidas e brillantes che istellas!

lncue su 'acchile cun sas baccas
bidia in sos beranos, cando fia
in s'innozente, allegra pizzinnia,
tra bandelas de 'aldu e usciareu
ue murghende latte babbu meu
mai sas ancas sentiat istraccas.

Como, 'addes amadas, non piusu
bido sa 'ostra costa indeorada,
chi guasi pro me pius non b'hada
iscopu senza 'ois in sa vida:
est una pena dura, incrudelìda
pro me, ca 'e bos bider so' isclusu!

Cantas boltas mi 'iso in cussos rios
tentende sas columbas in sas roccas!
E cantas boltas mi 'iso cun piccioccas
ballende a ballu tundu in cussos oros!
A boltas biso giuales e loros
giunghende sos antigos boes mios.

--Cfr.: BAINZU TRUDDAJU, Rosas e ispinas de Baldedu, Ivo Melis Editore, Cagliari 1992, pagg. 139-140