A fine Febbraio chiuderemo definitivamente il sondaggio sul nuovo anno. Ma chiameremo i nostri lettori a esprimersi su un altro quesito, che proporremo a decorrere dal 1. Marzo prossimo.

Sos ojios mios che 'iden lontanu

fìnas inue regnat sa miseria

sa diferenzia 'e su gener'umanu.

Cando ti miran cun ojiada seria

ojios nieddos chi ti faghen zinnos

siccat su sambene in dogni arteria.

S'intendet de campanas sos tintinnos,

de maladias malas a curare

subra a babbos, mamas e pitzinnos.

E sun'apitu a los agiuare,

in sos ojios lis morit s'isperanzia

pro no tennere ite mandigare.

In sos logos pienos de bundanzia,

suldos e mudos sun fatende festa

e zegos; chi nudda hat importanzia

pro sa truma de zente disonesta.

No intendet de martires sos gridos

pro chi bi sian a manca e a dresta.

Però sun cuddos pagos individos,

s'omine 'onu hat ateru gradu

de agiuare sos pius famidos.

Esercitos de volontariadu,

monzas, padres, ziviles e soldados

nos sunu dende bonu risultadu.

Ispero de nos esser'ischidados,

de nos dare sa manu pari pari

chi no nde fìmus mesu ismentigados.

A su cumpletu no semus mancari,

ca b'hat ancora ite tribagliare

contr'a sa maladi'e su inari.

Ma si sighimus a nos calculare

de unu pesu e una misura

cust'isperanzia hat a triunfare.

Cun sa cuscescia de peccados pura,

in abbandonu che siat s'imbrogliu

e sutterrada pro sempre sa fura.

Fatend'a mancu de su troppu orgogliu,

no bider gherra, ma sa paghe vera!,

hamus a superare dogn'iscogliu,

Acco' una firancada 'e ispera.

Cfr. Poesias de Istevene Demelas, pagg. 58-59